ಡಾ. ಸರ್ವಪಳ್ಳಿ ರಾಧಾಕೃಷ್ಣನ್: ತತ್ವಜ್ಞಾನಿ, ಶಿಕ್ಷಕ ಮತ್ತು ರಾಷ್ಟ್ರಪತಿ

ಡಾ. ಸರ್ವಪಳ್ಳಿ ರಾಧಾಕೃಷ್ಣನ್ ಅವರು 1888ರ ಸೆಪ್ಟೆಂಬರ್ 5ರಂದು ತಮಿಳುನಾಡಿನ ತಿರುತ್ತಣಿಯಲ್ಲಿ ಜನಿಸಿದರು. ಅವರು ಸಾಮಾನ್ಯ ಬ್ರಾಹ್ಮಣ ಕುಟುಂಬದಲ್ಲಿ ಹುಟ್ಟಿದರೂ, ತಮ್ಮ ಬುದ್ಧಿವಂತಿಕೆ ಮತ್ತು ಅಧ್ಯಯನದ ಆಸಕ್ತಿಯಿಂದ ಅಸಾಧಾರಣ ಸಾಧನೆಗಳನ್ನು ಮಾಡಿದರು. ಬಾಲ್ಯದಲ್ಲೇ ಹಿಂದೂ ಧರ್ಮದ ಅದ್ವೈತ ತತ್ವ ಮತ್ತು ಕ್ರೈಸ್ತ ಮಿಷನರಿ ಶಾಲೆಗಳ ಪ್ರಭಾವದಿಂದ ಅವರ ತಾತ್ವಿಕ ದೃಷ್ಟಿಕೋನ ರೂಪುಗೊಂಡಿತು.

ಅವರು ಬರೆದ ಮೊದಲ ಮಹತ್ವದ ಪ್ರಬಂಧ “ವೇದಾಂತದ ನೈತಿಕತೆ” (The Ethics of the Vedanta) ಪಾಶ್ಚಾತ್ಯ ಟೀಕೆಗಳಿಗೆ ಉತ್ತರ ನೀಡುವ ಪ್ರಯತ್ನವಾಗಿತ್ತು. ಈ ಕೃತಿಯು ಅವರಿಗೆ ಮದ್ರಾಸ್‌ನ ಪ್ರೆಸಿಡೆನ್ಸಿ ಕಾಲೇಜಿನಲ್ಲಿ ಉಪನ್ಯಾಸಕರ ಹುದ್ದೆ ತಂದುಕೊಟ್ಟಿತು. ನಂತರ ಅವರು ಮೈಸೂರು, ಕಲ್ಕತ್ತಾ, ಮತ್ತು ಆಕ್ಸ್‌ಫರ್ಡ್ ವಿಶ್ವವಿದ್ಯಾನಿಲಯಗಳಲ್ಲಿ ಪ್ರಾಧ್ಯಾಪಕರಾಗಿ ಸೇವೆ ಸಲ್ಲಿಸಿದರು. ಆಕ್ಸ್‌ಫರ್ಡ್‌ನಲ್ಲಿ ಅವರು ಪೂರ್ವ ಧರ್ಮ ಮತ್ತು ನೈತಿಕತೆ ವಿಭಾಗದ ಮುಖ್ಯಸ್ಥರಾಗಿದ್ದರು — ಇದು ಭಾರತೀಯರಿಗೆ ಅಪರೂಪದ ಗೌರವ.

ಅವರ ಪ್ರಮುಖ ಕೃತಿಗಳಲ್ಲಿ “ದ ಹಿಂದು ವ್ಯೂ ಆಫ್ ಲೈಫ್” (The Hindu View of Life), “ಅನ್ ಐಡಿಯಲಿಸ್ಟ್ ವ್ಯೂ ಆಫ್ ಲೈಫ್”( An Idealist View of Life), ಮತ್ತು “ಇಂಡಿಯನ್ ಫಿಲಾಸಫಿ” ( Indian Philosophy) (1921–1927) ಸೇರಿವೆ. ಈ ಕೃತಿಗಳಲ್ಲಿ ಅವರು ತತ್ವಜ್ಞಾನವನ್ನು ಸರಳವಾಗಿ, ಆಳವಾಗಿ ಮತ್ತು ಮಾನವೀಯ ದೃಷ್ಟಿಕೋನದಿಂದ ವಿವರಿಸಿದ್ದಾರೆ. ಅವರು ಬರೆದ ತತ್ವಗಳು ಧರ್ಮ, ನೈತಿಕತೆ ಮತ್ತು ಜೀವನದ ಅರ್ಥವನ್ನು ಸಮಗ್ರವಾಗಿ ವಿವರಿಸುತ್ತವೆ.

ಪಂಡಿತ ಜವಾಹರಲಾಲ್ ನೆಹರು ಅವರ ಪ್ರೇರಣೆಯಿಂದ ಅವರು ಸಂವಿಧಾನ ಸಭೆಗೆ ಸೇರಿದರು. ನಂತರ ಮಾಸ್ಕೋದಲ್ಲಿ ಭಾರತದ ರಾಯಭಾರಿಯಾಗಿ (1949–1952) ಸೇವೆ ಸಲ್ಲಿಸಿದರು. ಅವರು ವಿಶ್ವವಿದ್ಯಾನಿಲಯ ಶಿಕ್ಷಣ ಸಮಿತಿಗೆ  ಅಧ್ಯಕ್ಷತೆ ವಹಿಸಿ ವಿಶ್ವವಿದ್ಯಾನಿಲಯ ಅನುದಾನ ಆಯೋಗ  (University Grants Commission) ಸ್ಥಾಪನೆಗೆ ದಾರಿ ಹಾಕಿದರು — ಇದು ಭಾರತದ ಉನ್ನತ ಶಿಕ್ಷಣದ ಅಭಿವೃದ್ಧಿಗೆ ಮಹತ್ವದ ಹೆಜ್ಜೆಯಾಯಿತು.

ಅವರು ಭಾರತದ ಉಪರಾಷ್ಟ್ರಪತಿಯಾಗಿ (1952–1962) ಮತ್ತು ನಂತರ ದ್ವಿತೀಯ ರಾಷ್ಟ್ರಪತಿಯಾಗಿ (1962–1967) ಆಯ್ಕೆಯಾದರು. ರಾಷ್ಟ್ರಪತಿಯಾಗಿ ಅವರು ಭಾರತವನ್ನು ಜಗತ್ತಿಗೆ ಶಾಂತಿ ಮತ್ತು ಮಾನವ ಕಲ್ಯಾಣದ ಸಂದೇಶ ನೀಡುವ ರಾಷ್ಟ್ರವಾಗಿ ರೂಪಿಸಲು ಪ್ರಯತ್ನಿಸಿದರು. ಅವರು ತಮ್ಮ ಜನ್ಮದಿನವಾದ ಸೆಪ್ಟೆಂಬರ್ 5 ಅನ್ನು ಶಿಕ್ಷಕರ ದಿನವನ್ನಾಗಿ ಆಚರಿಸುವಂತೆ ವಿನಂತಿಸಿದರು — ಇದು ಇಂದು ದೇಶದಾದ್ಯಂತ ಶಿಕ್ಷಕರಿಗೆ ಗೌರವ ಸಲ್ಲಿಸುವ ದಿನವಾಗಿದೆ.

ಅವರಿಗೆ ಭಾರತ ರತ್ನ (1954), UK Order of Merit (1963), ಸಾಹಿತ್ಯ ಅಕಾಡೆಮಿ ಫೆಲೋಶಿಪ್ (1968), ಮತ್ತು ಟೆಂಪಲ್ಟನ್ ಪ್ರಶಸ್ತಿ (1975) ಸೇರಿದಂತೆ ಅನೇಕ ಗೌರವಗಳು ದೊರಕಿದವು. ಅವರು 1975ರ ಏಪ್ರಿಲ್ 17ರಂದು ನಿಧನರಾದರು.

ಅವರ ಜೀವನವು ಬೌದ್ಧಿಕತೆ, ಆಧ್ಯಾತ್ಮ, ಶಿಕ್ಷಣ ಮತ್ತು ರಾಷ್ಟ್ರ ಸೇವೆಯ ಶ್ರೇಷ್ಠ ಮಾದರಿಯಾಗಿದೆ. ಅವರು ತತ್ವಜ್ಞಾನವನ್ನು ಜನಸಾಮಾನ್ಯರಿಗೆ ಅರ್ಥವಾಗುವಂತೆ ವಿವರಿಸಿದರು, ಮತ್ತು ಶಿಕ್ಷಕರಿಗೆ ಸಮಾಜದಲ್ಲಿ ಗೌರವದ ಸ್ಥಾನ ನೀಡುವ ಕೆಲಸವನ್ನು ಪ್ರಾರಂಭಿಸಿದರು. ಅವರ ಆದರ್ಶಗಳು ಇಂದು ಕೂಡ ಶಿಕ್ಷಣ ಮತ್ತು ತಾತ್ವಿಕ ಚಿಂತನೆಗೆ ದಾರಿ ತೋರಿಸುತ್ತಿವೆ.